Şeysəbani

Bəlkə də çoxlarınız bu kəlmə ilə yeni qarşılaşırsız. Google axtarış saytında Azərbaycan dilində bu barədə bir dənə də olsun məlumata rast gəlinmir. Bunu nəzərə alaraq zühur və məhdəviyyət barədə maraqlanan dostlar üçün bu yazını yazmağı qərara aldım…

Həzrət İmam Mehdinin (ə) zühuru ərəfəsində meydana gələcək Şeysəbani nədir?
Həzrət İmam Mehdinin (ə) zühurundan qabaq və sonra bir çox hadisələrin olması danılmazdır. Bu ərəfədə zühur aid əsasən beş əlamət qeyd edilir. Bunlar Süfyaninin çıxışı, Səmadan gələn səs, Beyda diyarının İmamın (ə) düşmənlərini kamına çəkməsi, Nəfsi Zəkiyyənin qətli və Yəmani adlı cəsur bir İmam (ə) sərkərdəsinin gəlişidir. Bu sadalananlar mütləq əlamətlərdən hesab olunur. Bunlardan başqa zühur ərəfəsində bir çox hadisələrin də baş verəcəyi qeyd olunmuşdur ki, bunlardan biri Şeysəbaninin meydana gəlməsidir. Şeysəbani də, eyni ilə, Dəccal və Süfyani kimi mənfi xüsusiyyətlərə malik olan şəxs, yaxud cəryandır. Fərqi yalnız Şeysəbaninin şiələrə və Əhli-Beytə (ə) olan xüsusi nifrətidir. Bunun da meydana gəlməsində əsas məqsədi Həzrət İmam Mehdiyə (ə) mane olmaq, İmamın ardıcıllarını zaman-zaman qətlə yetirməkdir. Öz sələflərinin sünnətini davam etdirərək Əhli Beytə (ə) bağlı olan hər bir kəsi öldürmək və meydandan uzaqlaşdırmaqdır. İndi isə Şeysəbaninin nə və yaxud kim olmasına diqqət yetirək.
“Şeysəbani” kəlməsi ərəb dili lüğətində “erkək qarışqa”, “qarışqa yuvası”, “azğın qrupun rəhbəri”, “qızıl suyuna çəkilmiş əslində saxta olan əşya” mənalarını verir. Dini ədəbiyyatda bu kəlmə eyni zamanda İblisin adlarından və ləqəblərindən biridir. Termin olaraq Məsum İmamlar (ə) bu kəlmədən məhz Bəni-Abbas sülaləsi üçün istifadə etmişlər. Buna səbəb Abbasilərin İslam dininə vurduğu zərbə olmuşdur. Onların hakimiyyətə gəlməsi ilə qətl və kütləvi qırğınların geniş vüsət alması tarixdə müfəssəl qeyd olunmuşdur. Bir neçə nüansı mətləbin aydın olması üçün qeyd edirəm:
Tarixə nəzər saldıqda Abbasilər qiyamının əvvəllərində ilk Abbasi xəlifəsi Əbul-Abbas əs-Səffahın Əbu Müslim Xorasaniyə yazdığı vəsiyyətin mətninə rast gəlirik. Əmiri-Ali-Məhəmməd (səlləllahu əleyhi və alih) ləqəbi almış tanınmış qəhrəman Əbu Müslim Xorasani Məkkəyə səfəri zamanı Əbul-Abbas əs-Səffahla görüşür. Səffah öz vəsiyyətlərini ona deyir, sonralar Abbasilərin simvolu olmuş QARA BAYRAĞI ona verərək Xorasanda (o dövrdə Xorasan böyük bir ərazini əhatə edirdi, buraya İraq, Əfqanistan və sairə aid edilirdi) qiyam qaldırmaq üçün oraya göndərdi. Səffah bu fərmanın (vəsiyyətin) əvvəlində Əbu Müslimə deyir: “Sən bizim ailəmizdən olan bir şəxssən. Sənə nə deyirəmsə, ona əməl et… (Bizə qarşı vəfalı olmaqda) kimdən şübhələnsən onu qətlə yetir, əgər bacarsan, Xorasanda bir nəfər də olsun belə ərəb qoyma. Hətta beş qarış boyunda bir uşaqdan da şübhələnsən öldür”. Tarixçilər yazırlar: “Əbu Müslimin öz hakimiyyəti dövründə öldürdüyü adamların sayı altı yüz min nəfər olmuşdur”. Əbu Müslim özü bu cinayətlərini etiraf edirdi. O ikinci xəlifə Mənsur tərəfindən hədələnərkən ona bir məktub yazıb bildirdi: “Qardaşın (Səffah) mənə əmr verdi ki, qılınc çəkib şübhələndiyim şəxsi həbs edim, kiçik bir ittiham vasitəsilə qətlə yetirim, heç bir bəhanəni qəbul etməyim. Mən də onun əmrinə itaət edib Allahın hörmət olunmasını vacib buyurduğu bir çox şeylərin hörmətini pozdum, Allahın hörmətinin saxlanılmasını vacib buyurduğu bir çox qanlar axıtdım, hakimiyyəti onların əlindən alıb başqasına verdim…”
Başqa bir mənbədə Əbu Müslimin döyüşənlərdən başqa öldürdüyü mülki şəxslərin sayı yüz min nəfərə gədər qeyd edilir. (Əl-kamilu fit-tarix, c. 5, səh. 436; Əl-bidayə vən-nəhayə, c. 10, səh. 54; Tarixi-Yəqubi, c. 3. səh. 105).
Bütün bunlar hələ Abbasi xilafətinin başlanğıcı olaraq qeyd edilir; bu xilafət Əhli-Beyt (ə) ardıcıllarına da amansız divan tutmuşdur. Həzrət İmam Saqiqdən (ə) başlayaraq İmam Həsən Əsgəriyə (ə) kimi Əhli-Beyt (ə) xanədanının məsum imamlarının qətlində günahkardırlar. İstila etdikləri ərazilərdə qeyri-müsəlmanlara etdikləri zülmlər nəticəsində “Səlib yürüşləri” kimi yüz minlərlə insanın qanı axıdılan çoxillik müharibələrə də məhz onlar bais olmuşlar.
Məsum İmamlar (ə) öz ardıcılları arasında danışarkən həqiqətləri bəyan etmək üçün və eyni zamanda Bəni-Abbas xilafətinin şərrindən qorunmaq üçün bu adı işlədirdilər. Bəni-Şeysəbani dedikdə məlum olurdu ki, söhbət nədən gedir. İmamlar (ə) tərəfindən bu adın Abbasi sülaləsi üçün işlədilməsi, şeysəbaninin həm də nə vaxtsa gələcəyindən, yaxud Abbasilər kimi zalım və şiə düşməni olan hakimiyyətlərin yaranacağından xəbər verir. Eyni zamanda Şeytanın nəslinin qiyamətə kimi davam etməsi də dini mənbələrdə ətraflı qeyd edilmişdir. Hədislərdə Şeysəbani zühur ərəfəsində Süfyanidən qabaq çıxacaq bir şəxsin və ya bir irtica üsul-idarə növünün adı kimi qeyd edilmişdir. Şiələrə xüsusi amansızlığı ilə tanınacaq bu çıxış minlərlə günahsız insanın qanını tökəcəkdir. Şeysabaninin öz adının nə olması rəvayətlərdə qeyd olunmayıb. Bəlkə də elə rəvayətlərdə adın qeyd olunmamağı bu adın bir nəfərə deyil, bir cəryana , batil bir quruluşa şamil edilməsinə rəvac verən amillərdən olub. Hədislərdə qeyd olunur ki, Şeysəbani Bəni-Abbasın nəslindəndir, yaxud onların hakimiyyət və zülm yolunu davam etdirən bir təfəkkürdür. Onlar necə zülm və sitəm edirdilərsə, Şeysəbani də meydana gələndə məhz onların “qara bayraqları” ilə həmin zülmləri edəcək. Abbasilərin şiələrə etdiyi zülmlərin eyni olaraq Şeysəbanilik də şiələrə qatı düşmən kəsiləcək.
Cabir İbn Cofi İmam Baqirdən (ə) nəql edir ki: “…Bir gün Həzrət İmam Baqirdən (ə) soruşdum: “Ey Allah Rəsulunun övladı, bizə Süfyani haqda danış, o kimdir? Nə vaxt üzə çıxacaq? Nə işlər görəcək?” İmam Baqir (ə) buyurdu: “Hələ Süfyaninin meydana gəlməsinə çox var, neynirsən onu?! Hələ ondan qabaq böyük bəlalar var, müsibətlər var. Onlardan biri Süfyanidən qabaq Şeysəbaninin İraqdan ortaya şıxışıdır. Su yerdən qaynayıb çıxdığı kimi, o da qəfil çıxaraq hökümət başına keçər və zülm edər. Şiələrimizi öldürər, bundan sonra Süfyani meydana çıxar…” (Əl-Ğeybət, s. 302, fəsil 18, c. 8) Bu hədisdən bir neçə mühüm mətləblər başa düşülməkdədir:
1) Şeysəbaninin Bəni-Abbas sülaləsindən olması
2) Meydana çıxdığı məkanın İraq olması
3) Meydana gəlməsində məqsəd şiələri məhv etmək olması
4) Zalım bir fərdin bir cəmiyyətə öz nəzərlərini rəhbər tutaraq hakimlik etməsi.
Bu nöqtələri rəhbər tutaraq hər bir dövrdə bu xüsusiyyətlərə uyğun gələn insan və ideologiyalar şeysəbani ola bilər. Son dövrümüzün iki şeysəbanisini xüsusi olaraq qeyd etmək istəyirəm. Məhdəviyyət mövzusunu araşdıran alımlər hədislərin uyğunluğunu dəqiqləşdirərkən çox dəqiq olan nəticələrə gəlməkdədir. Belə ki, yaxın tarixdə şeysəbaniyə, yəni iblis törəməsinə uyğun gələn insan və quruluşlardan biri də Səddam Hüseyn Abdulməcid ət-Tiqriki və onun hakimiyyətidir.
Səddam Hüseyn, özündən əvvəlki İraq dövlət başçılarından fərqli xüsusiyyətlərə malik bir lider olmuşdur. Müasir İraq tarixində hakimiyyətdə olmuş bütün liderlərdən daha hirsli, daha gözü qara, şiələrə qarşı daha acımasız biri olmuşdur. Səddam Hüseyn, insanlığa qarşı işlənmiş cinayətlər kateqoriyasına daxil olan kütləvi qətliam və soyqırım əməliyyatlarına imza atmışdır ki, bu üzərində mübahisə olmayan bir məsələdir. General Əhməd Həsən Bəkiri 1979-ci ildə devirərək hakimiyyətə gələn və o gündən qətlinədək İraqı idarə edən Səddam, iqtidara gələn kimi ilk olaraq, öz rəhbərliyinə müxalifət olma ehtimalı olan 450 partiya üzvünü edam etdirdi. Səddam 24 illik iqtidarı zamanı bir çox qətl, zorakılıq və hücumlarda ittiham edilmişdir. Bunlar əsasən aşağıdakılardır:
İran-İraq müharibəsi. İraq 1980-cı ildə İrandakı İslam inqilabından sonra sərhəddə kiçik toqquşmalardan sonra İran ərazilərini işğal edərək müharibəyə başladı. Bu müharibə zamanı təxminən 1 milyon insan ölür, 10 milyon insan müxtəlif xəsarətlər alır. Müharibə 1988-ci ildə İranın qələbəsi ilə sona çatır. Nəzərə alsaq ki, İran əhalısının 95 faizi şıə müsəlmanıdır onda Səddamın əsas hədəfi də bəlli olur. Bu müharibədə Səddamın kimyəvi silahdan istifadə etdiyi xüsusi qeyd olunur.
Hələbcə qətliamı. İraqdakı kürdlər muxtariyyət tələblərini artırdıqları üçün 1988-ci ildə Səddam kimyəvi silahdan istifadə edərək qadın və uşaqlar da daxil olmaqla 5 min adamın həlak olmasına səbəb oldu. “Kimyagər Əli” olaraq tanınan Səddamın Generalı Əli Həsən əl-Məcid Səddamın əmri ilə kimyəvi silahlardan da istifadə edərək kürdləri yaşadığı bölgələrdən çıxartdı .
Küveytin işğalı. Səddamın komandanlığındakı İraq ordusu Küveyti işğal edərək Körfəz müharibəsinin başlanmasına səbəb oldu. İraq əsgərləri Küveytdən çəkilərkən yüzlərlə küveytlini əsir alaraq Bağdada apardı, şəhəri talan etdi. Müharibə zamanı 700-dən çox neft quyusu yandırıldı, neft boru xətləri açılaraq körfəz suları və digər su qaynaqları natəmiz hala gətirildi.
Cinayətlər və işgəncə. İraqda on minlərlə insanın basdırıldığı 270 ümumi qəbrin var olması barədə sübutların var olduğu bildirilməkdədir. BMT İnsan Haqları Komissiyası 2001-ci ildə İraq hökumətinin “Həbs edilənlərə qarşı sistematik və amansız, insanlıqdan kənar cəzalar verdiyini” pisləmişdir.
Səddam Hüseyn hakimiyyətə gəldikdən sonra ölkədən 40000 yaxın şiəni ancaq şiə olduğu üçün xaric edir və şiələrin din xadimi olan Ayətullah Məhəmməd əl-Bəkr Sədr başda olmaqla onlarla şiə alimini edam etdirir, müasir tariximizdə Abbasi xəlifəsi Mütəvəkkildən sonra ilk dəfə İmam Hüseynin (ə) qəbrini viran etdirir, illərcə zəvvarları ziyarətə buraxmır.
Öz qanı ilə Quran yazdıran Səddam Hüseyn Qurani-Kərimi Şakir Cövdət Abbas Bağdadini ölümlə təhdid edərək yazdırır. İstəməyərək bu işi gördüyünü qeyd edən xəttat Şakir Cövdət Abbas Bağdadi, sonralar deyirdi: “Səddamın 40 şüşədən artıq qanını istifadə etdim. Həftədə bir hissə bitirirdim. Yazarkən yeməkdən kəsildim, saçlarım töküldü, gözlərim pozuldu…” Və sadalanması vaxt aparan yüzlərlə digər cinayətlər.
Müasir dövrümüzdə ikinci iblis törəməsi olan – şeysəbani İŞİD (İraq Şam İslam dövləti) adı altında yaranan yırtıcı vəhhabi dəstələridir. Eyni ilə hədisdə qeyd edildiyi kimi “qəfil yerdən qaynayan su” kimi Abbasilərin qara bayrağını qaldıraraq və “qızıl suyuna çəkilmiş”, yəni müqəddəs İslam adı altında gizlənmiş halda İraqda peyda oldular. İraqın Neynəva və Mosul vilayətləri başda olmaqla beş vilayətini ışğal etdilər. Ümumilikdə 1.4 milyon insanı girov götürdülər. İşğal etdiyi ərazilərdə dəhşətlı qətliamlar törətdilər. Təkcə Mosul vilayətində 2070 nəfəri başı qılınc və bıçaqla kəsilmək şərti ilə edam etdilər. Müsəlman qadınları zəncirləyib bazarda qul kimi satdılar. Minlərlə qız-gəlinə təcavüz etdilər. İnsanları dini mənsubiyyətinə görə seçərək şiələrə qarşı xüsusi amansızlıq etdilər. Belə ki İŞİD-in rəhbəri Əl-Bağdadinin əmri ilə şiə olan insanların malı, canı, namusu halal hesab olundu. İraqda 5 mindən artıq insan ancaq şiə olduğu üçün qətlə yetirildi. Minlərlə insan öz yurd-yuvasından didərgin düşdü… Bu çirkab hələ də davam etməkdədir.
Gələcəkdə neçə-neçə şeysəbanilərin çıxacağını bir Allah bilir. Amma ümid verən hal odur ki, bu zalımların axırı öz qanlarına boyanmaqla və tarixdə lənətlənməklə bitir. Günahsız öldürdüyü insanların hesabı isə axirətdə onları gözləyir. Allahın qisası isə daha dəhşətlidir. Bu və buna oxşar bütün qaniçənlərdən Allaha sığınırıq və zamanın sahibi olan Mehdinin (ə) gəlişi üçün dua edirik.